Cola ilusión d'entamar una fiesta prestosa, pusimonos a la obra la xente La Semiente, primero cola recuperación de los cabezudos, que nos prestó la Sociedá de Festexos de La Llaguna, y colos que fizimos disfrutar a grandes y pequeños coles mazcarones, la pareya de gaiteru y tamboriteru que amenizaba el pasacais y echando unes carrerines colos neños entreguinos de Miercoles nel mercau (aunque tamién hai que decir qu'algun guahe, pola falta costumbre nun dexaba de berrar, pero seguro que camuda en pocu tiempu)
Mientres tanto la Foguera diba garrando forma cola colaboración de mucha xente del pueblu y los pueblos vecinos que nos apurrien maera y aplaudien la nuesa iniciativa.
Llegó el xueves. YERA EL DÍA! Pela mañana entamose cola estructura de la pila maera que teniemos, dempués de que se colocará el llargu palu central. Pe la tarde, por otru llau preparemos un par de carpes y unos decoraos en los que un grupín de artistes de La Semiente, representaríen una fabula reestructurá ambientá nesti conceyu de Samartín del Rei Aurelio.
Llegaron les 11 la nueche los cabezudos llegaben al prau dempues de dos hores escorriendo guahes pel pueblu y comenzaben les actividaes. Primero cola obra, co a que tol mundiu quedó encantao pol mensaxe, la gracia los actores (Armandona, Xuan, la Xanina, los indignaos o el home coxu) y la puesta n'escena.
Tras la representación y un pequeñu descansu, entamose con una exibición de malabares nocheriegos con fueu, lluces y percusión (po la que queremos dar les gracies a la xente'l Ñeru los Corios y otros malabaristes que se averaron dende Siero, pertenecientes a la A.J. L'Esperteyu), previa al encendiu de la Foguera, en la que'l compañeru de la Semiente Delfín, entonó un entreteníu conxuru citando los 4 elementos de la naturaleza, con el fueu como protagonista.
Tras estes prestoses pallabres, un Malabarista arrimó l'antorcha y en un minutu tola maera empezó a arder, llenando de lluz, ilusión, color y folixa, el prau, el pueblu y yo diría qu'hasta'l conceyu (con perdón de la xente que tamién monto foguera nel Serallo, los cuales tienen to'l nuesu apoyu)
Col fueu como collaciu baillose una multitudinaria danza prima alredor de la Foguera y muchos rapaces quedaron elli, embobaos coles ascuares y la musica de la percusión, la gaita y la flauta que nos fizo disfrutar hasta altes hores, celebrando asi'l solsticiu de branu, como tien que ser.
Añadir a too esto l'agradecimientu, a la pareya de Gaiteros que nos animaron los pasacais y la folixa, a los malabaristes y les sos acrobacies, a los que apurrieron maera y fizieron posible la Foguera y a tos los que nos apoyasteis d'una manera u otra pa que al final tol pueblu disfrutase d'una folixuca prestosa. GRACIES!
Tamién queremos pedir perdón polos fallos que pudieramos tener na organización del eventu y que l'añu que vien intentaremos por tolos medios solventar de la mayor manera posible.
LA SEMIENTE - Semando un nuevu futuru!
No hay comentarios:
Publicar un comentario