COMUNICÁU DEL CENTRU SOCIAL AUTÓXESTIONÁU “LA SEMIENTE”
Por mediu d’esti
comunicáu, aprobau n’asamblea pol colectivu “La Semiente”, queremos
espresar el nuesu apoyu a la llucha de tolos colectivos en conflictu pola
defensa de los sos drechos y condiciones llaborales, faciendo especial mención
a la minería y el tresporte, que n’estos díes caltienen una fuelga indefinía.
De la mesma manera, criticamos l’actitú del gobiernu de negase a una
negociación seria y sin torgues p’algamar la solución d’estos conflictos,
obligando a los colectivos afectaos a llegar a estes midíes estremes.
Asina mesmo,
criticamos tamién la criminalización y represión de la llucha obrera y
manifestamos el nuestru apoyu a dichos colectivos en conflictu pa que
defiendan les sos reivindicaciones
llevando a cabu les acciones que crean necesaries, colos métodos que consideren
oportunos.
Señalamos al
sistema lliberal-capitalista como responsable de la conflictividá social que
tamos viviendo, y desiximos de los poderes públicos un cambiu d’actitú pa coles
xustes protestes obreres y ciudadanes frente al retrocesu económicu y social al
que nos vemos abocaos por culpa de tal sistema. Igualmente desiximos la
restauración inmediata del fluxu de fondos públicos destinaos a sanidá,
educación y servicios sociales, asina como de los fondos destinaos al
desarrollu de comarques económicamente deprimíes, como ye’l casu de los Fondos
Mineros, aporfiando con especial enfotu en que dichos fondos se xestionen con
tresparencia y xusticia pa evitar la corrupción y el despilfarru a los que, por
desgracia, tamos tan avezaos.
Por últimu,
queremos animar a la xente a salir a la calle pa defender lo que ye suyo, cola
conciencia clara de que’l problema d’un colectivu ye’l problema de toa la
ciudadanía, y que solamente con unidá y apoyu mutuu podremos evitar los abusos
d’esti sistema perversu.
No hay comentarios:
Publicar un comentario