Solidaridá dende Grecia pa cola llucha de la minería.

Ponemos equí una carta que'l Centru Social Autoxestionáu La Semiente recibió dende Grecia, concretamente de l'Asamblea Popular de Réthimno, en Creta. Espero que la espardais perhí pa que'l so mensaxe de solidaridá s'esparda, y pa que tamién s'esparda l'espiritu de llucha escontra esti sistema.

Solidaridá a los trabayadores en resistencia d'Asturies dende l'asamblea popular de Réthimno, Creta, Grecia

Va unos díes cuerpos especiales de la Guardia Civil Española trataron de romper el bloquéu de la Carretera Nacional en Ciñera, usando lanzapelotes contra los mineros güelguistes. Nos últimos díes los enfrentamientos aumentaron en respuesta a la intensificación de les movilizaciones mineres. Los trabayadores tán en fuelga indefinida en protesta polos recortes de 63 % de les subvensiones estatales a esta industria.

L'Asamblea Popular de Réthimno, Creta, Grecia, de parte de la xente en resistencia en Grecia, manda un saludu solidariu a la xusta llucha de los mineros nel norte del Estáu Español. Yá llegó'l tiempu por qu'entiendan los Banqueros, el capital financieru y el sistema capitalista polo xeneral, que nun se pue xirar nin un engranaxe ensin los trabayadores. Y, cuando nun xira'l engranaxe nun se xenera riqueza, como resultáu'l capitalismu muérres, arrasando a tolos que-y tán sirviendo.

Yá llegó'l tiempu por que se llevanten los trabayadores encontra d'esti sistema antropófagu d'esplotación, pa construyir un mundu de paz ensin la esplotación del home pol home.

L'ASAMBLEA POPULAR DE RÉTHIMNO SOLIDARÍZASE COLA LLUCHA DE LOS MINEROS NEL NORTE DEL ESTÁU ESPAÑOL

¡LA SOLIDARIDÁ YE L'ARMA DE LOS PUEBLOS!

¡HASTA LA VICTORIA SIEMPRE COMPAÑEROS!