Comunicau escontra les ultimes agresiones fascistes en Xixón

Los fechos:
Apocayá una pareya de neonazis abrieron un chigre na C/ Gran Capitán, frente al edificiu del INEM, nel barriu xixones de La Calzada.

Esti chigre, que sirve de llugar d’alcuentru de neonazis, yá traxo los primeres y graves problemes de convivencia nel barriu. N’apenes un par de selmanes pasaron d’amedranar a mozos del barriu por tener ideoloxíes contraries a les suyes, a intentar atacar con un cuchiellu a un vecín del barriu, esti xueves día 11 d’Ochobre. Inexplicablemente (o non), inclusive dempués d’intentar atacar a un mozu con un cuchiellu, los mesmos neonazis nun duldar en llamar y amenaciar cola policía nacional al nuesu compañeru.

Esti sábadu día 14, alredor de 40 neonazis, dirixiéronse a La Cruz, campu del equipu de fútbol UC. CIARES una hora y media antes del partíu, y frayaron a quien s’atoparon, esta vegada tocó-y al vicepresidente del Ceares, que taba a la puerta p’abrir el campu. La policía taba informada de lo que podía asoceder, y nun actuó, magar les numberoses llamaes de vecinos del barriu de Ciares y de Viesques qu’alvertíen de la presencia de grupos de nazis encapuchaos nel barriu, dirixiéndose a La Cruz.

Dende'l Centru Social Autoxestionau "La Semiente", en primer llugar, queremos mostrar la nuesa solidaridá colos agredios, así como tamién cola afición y la directiva del UC Ciares, los cuales tan faciendo una gran llabor col barriu y pol futbol asturianu, demostrando qu'el futbol social tamién ye posible nestos tiempos de salarios estratosféricos, publicidá y capitalismu nel mundiu futbolísticu.
 
En segundu llugar condenamos estes cobardes y ruines acciones, de esta marea neonazi que inunda la villa xixonesa, y que amparaos nel grupu ultra fascista "Ultra boys" vinculau al Real Sporting de Xixón (que nun olvidemos, dexa usar les sos instalaciones a estos elementos) y "la xusticia" que dexa impune estes agresiones y otres cometies por esta gandalla . Que créense col derechu a facer atrocidaes como les narraes anteriormente, escontra de los que nun entren na su "pureza" racial, ideolóxica y cultural.

Por último, anunciar que na tarde de güei, Martes 16 d'Ochobre, va cellebrase una asamblea abierta na casa sindical de Xixón a les 19h de la tarde, pa organizar una respuesta ciudadana y antifascista que plante cara a estos energúmenos sin cerebru que quieren amedrentar les nueses ganes de lluchar polo xusto e igualitario.

GÜEI COMO AYERI, ESCONTRA EL FASCISMU...
NI UN PASU ATRÁS!