Inauguración por derribu

Esti sábadu día 17 de noviembre, va tener llugar en Samartín del Rei Aurelio una peculiar inauguración. Tràtase de la primer INAUGURACIÓN POR DERRIBU.  L'edificiu a inaugurar ye'l CEMPA, Centru d'Estudios Medioambientales del Principáu d'Asturies, asitiáu na redoma del Muséu de La Minería en L’Entregu. Esti edificiu construyíu en 1996 costó 900.000 euros (150 millones de pesetes) y nunca llegó a utilizase. Una vegada refugáu'l so usu como Centru d'Estudios Medioambientales analizáronse dellos destinos pero nenguna de les propuestes llegó a bon puertu. Ente elles atopábase ser see del centru d'empléu o d'empreses de nueves tecnoloxíes o al so tresformamientu nel centru de recepción del espaciu protexíu de les Cuenques. Finalmente, en 2002 el Conceyu dexó les instalaciones al Mumi pa l'ampliación del so espaciu espositivu. Pero los elementos que taba previstu que s'instalaren nel edificiu incorporaronse a la esposición central del muséu, que se centró na construcción de la galería que va conectar el centru col pozu San Vicente, onde se va allugar el Muséu del Movimientu Obreru. Tou un marabayu de despropósitos y mala xestión que fixeron que la dexadez y la falta de responsabilidá del conceyu pa col equipamientu, ésti atópese en claru estáu d'abandonu y bien deterioráu.  Nel ultimu plenu, el conceyu de Samartín aprobó destinar 30.000 euros al valtamientu d'estes instalaciones.
Pero esto nun ye un casu aislláu, col dineru de los fondos mineros construyéronse munchos otros edificios y equipamientos que nunca llegaríen a funcionar, como l'espaciu de L’Abeduriu, cola so Aula de Naturaleza, les sos cabanes, chigre… que tampoco llegaríen a estrenase. Tenemos tamién los Talleres del Conde en LLangreu, o la estación d'Autobuses que paecen que quieren dexar obsoleta a pocos años de la so construcción… y asi cantidá d'exemplos. A esto hai que suma-y inversiones n'empreses trampa como Venturo 21 y Ales Aluminiun, qu'amás de entrar nel xuegu del marafundiu de fondos públicos tamién entra nel drama del desempléu y l'incertidume de cientos de trabayadores y les sos families.
Ta claro que l'abandonu y la mala xestión de les propiedaes públiques tien unos responsables, y ye necesario que'l pueblu y tolos axentes sociales como asociaciones de vecinos y colectivos de toa índole esixan esplicaciones y la depuración de responsabilidaes ellí onde sía necesariu.
Esti sábadu a les 13:00h, pa criticar too esto, pero faciéndolo dende un puntu de vista irónicu, el Centru Social La Semiente, va realizar una peformance a la que convida a tol mundu a asistir y a participar, onde se va inaugurar el valtamientu del CEMPA. En dicha inauguración van tar presentes representantes del gobiernu municipal, autonómicu, central, representantes sindicales… y hasta s'espera la presencia d'un miembru de la Familia Real. L'actu nel que va quitase la primer piedra, va ser solemne y elegante, polo que se ruega a tol mundu a dir bien curiosos y coles sos meyores gales.