La Semiente ante la Fuelga Xeneral del 14N

El día 14 del mes de Payares, los sindicatos mayoritarios convoquen una Fuelga Xeneral en tol estáu español. Una fuelga que va confluyir con otres lluches y fuelgues convocaes n'otres partes d'Europa, como Grecia, Italia, Portugal, Chipre y Malta.

Dende'l Centru Social La Semiente, queremos sumanos a la FUELGA XENERAL, yá que entendemos necesaria l'aición social y popular pa parar la sangría que dende la gran infraestructura del capital y el FMI, a los gobiernos estatales y autonómicos de toa Europa, tán aplicando al pueblu. Fai falta dicir que ya valió, ye necesario amosar el nuesu refugu a tolos retayos sociales, a los retayos llaborales y a la perdida de llibertaes, a les que se nos ta sometiendo de forma gratuita col pretestu la CRISIS. Una coartada perfecta p'aplicar les polítiques del capital y convertinos entá más n'esclavos del sistema.

Sabemos qu'una Fuelga Xeneral ye una gastadura pa les persones implicaes, un palu mas a la so economía o un riesgu pa el trabayadores en delles empreses con contratos precarios. Pero ye necesariu tomar conciencia de que si nun lluchamos, si nun aguantamos, los ataques del capital van ser cada vez mas duros y vamos dir de cabeza escontra situaciones personales y colectives entá mas graves.

Tamién entendemos la rocea de gran parte de la población pa colos sindicatos, pero eso nun tien de faer que permanezamos impasibles. Ye necesario articular una respuesta popular contra los retayos y los abusos de la banca, el gobiernu y la patronal, pero tamién ye necesario articular un discursu críticu contra les grandes centrales sindicales, que dende yá fai tiempu abondu son un meru intermediariu ente la patronal y los trabayadores; y por ello tenemos de dexar claro que nun nos conformamos coles migayes que nel nome nuesu pretenden apautar. Nun se trata de faer el caldu gordu a la derecha y atacar el sindicalismu, non. Trátase de criticar la practica de ciertos sindicatos que se profesionalizaron y nos que'l poder yá nun ta na asamblea si non en cúpules gratamente acomodaes y apoltronaes recibiendo grandes sumes en forma de subvenciones por parte de l'alministración, y yá sabemos qu'un perru nun muerde la mano que-y da de comer. Al marxe de les traiciones d'esos sindicatos, tien de lluchase pola esistencia del sindicalismu de clase (qu'esiste) como una forma más de lluchar polos nuesos derechos; non solo llaborales, sinón sociales.

Ta claro qu'un paru de 24 hores nun ye realmente una fuelga efectiva, una Fuelga Xeneral realmete efectiva, tien que ser indefinida, pa que-yos dea fuerte nes sos coraes. Pero nun escaezamos que sigue siendo una arma potente de llucha, y ta nes nueses manes utilizala.

Por ello queremos animar a toles persones a participar nel paru de 24 hores del 14N. Pero tamién queremos animar a toles persones a lluchar polo que ye nueso y a faelo non solo'l 14N, sinón tolos díes, yá sía nel so ámbitu mas cercanu y familiar o diendo a les distintes movilizaciones que se tán convocando toles selmanes dende distintos sectores llaborales o sociales.

Pa la xornada del 14N hai convocaes distintes movilizaciones en Asturies:
ADEPAVAN (Asociación de Paraos del Valle del Nalón) va llevar a cabu una acción de protesta a les 12.00 hores delantre les oficines del Serviciu Públicu d'Empléu de La Felguera.

Manifestación de la esquierda sindical de Asturies:

Los sindicatos CSI, CGT, CNT Y SUATEA; convoquen una manifestación el próximu miércoles 14 de noviembre, día de la Fuelga Xeneral, a les 12:00 h., Na Plaza de L’Humedal de Xixón.

Los sindicatos mayoritarios van manifestase n'Uviéu, a les 18.00h. A esta convocatoria van allegase distintos colectivos y persones formando un Bloque Criticu. Tamién ta prevista la presencia d'un Bloque Criticu de clara concepción Anticapitalista.

EL 14-N nun trabayes, nun merques, nun consumas... el 14-N llucha!!