"Fanzines, Ferramienta Contracultural". Vienres 17.

Esti vienres día 17 de mayu nel Centru Social Autoxestionáu La Semiente va faése la esposición/alderique "Fanzines Ferramienta Contracultural". L'actividá arrincará a la 17:00 hores y a les 19:30h van presentase nueves publicaciones per parte de los sos autores ,y si l'ambiente ye afayaizu, poder faer un alderique sobrel'l futuru d'esta ferramienta autoxestionada. La temática principal de la esposición son los fanzines de conteníu político-social, musicales o d'opinión, fechos n'Asturies nes pasaes décades hasta l'actualidá. El fanzín foi una ferramienta contracultural dende la so apaición nos años cuarenta. El desenvolvimientu de los fanzines ta xuncíu al de los medios d'edición de baxu costu como la multicopista y la fotocopiadora (que tamién fueron y son soportes pa toa clase de folletos, pasquinos y octavielles revolucionaries y contraculturales). Ye por ello que cola apaición d'Internet cayeron casi nel olvidu, dexando pasu a los Blogues y les Webzines. El mayor puxu nel estáu español ye nos 80 y nos 90, cuando nuna dómina onde consiguir y compartir información alternativa de los mas estremaos temes yera bien complicao; munches xeneraciones de moces atoparon nos fanzines la forma de conocer, d'informase, de formase, de compartir too aquello que los medios de comunicación oficiales y los llibros de testo nun amosaben.
Animamos a toes aquelles persones que quieran, pase per ellí y traigan les sos propies colecciones y compartan les sos esperiencies, arriqueciendo l'alderique.