"La Chelita. El Salvador 1992". Presentación llibru/comic.

El dibuxante y músicu Ruma Barbero, miembru del grupu de folk Felpeyu, Presenta esti xueves 16 de mayu nel Centru Social Autoxestionáu La Semiente la so nueva novela gráfica: La Chelita. El Salvador 1992. Na presentación va faese una proyeción de material graficu sobre El Salvador y tamien habra firma d'exemplares. La actividá tará presentada por Javier Arjona, miembru de Soldepaz Pachakuti y conocíu cooperante internacional, que compartirá coles asistentes la situación en El salvador antes y depués de la paz.
Barbero, que ganara’l premiu Alfonso Iglesias de Cómic en Llingua Asturiana na so edición de 2009 por Manzajú, vuelve  ofrecenos una nueva narración gráfica na que exhibe’l so dominiu técnicu de tolos recursos propios del cómic. L’apaición d’esta nueva publicación cobra una especial importancia pos nun son munches les posibilidaes d’atopanos con esti xéneru lliterariu na lliteratura asturiana. Editá n’asturiano por Tierra Llibros, La Chelita ye una novela gráfica de 160 páxines que fala de les vivencies y testimonios de los cooperantes internacionales y veteranos de la guerrilla salvadoreña. Asina, el cómic ye un viaxe personal pela historia más tráxica d’El Pulgarcito d’América Llatina, con testimonios autobiográficos y esperiencies humanes cola guerra y cola paz.



Pa entender un poco la obra:
La Chelita. El Salvador 1992
A lo llargo la década de los 80 del sieglu XX, muncha xente mozo europeo volcóse na cooperación internacional, col idealismu y la solidaridá por bandera y cierta inxenuidá en munchos casos. En xineru de 1992 fírmense los alcuerdos de paz de Chapultepec que ponen fin a la guerra civil qu’asolara El Salvador a lo llargo de 12 años.
Charo, una psicóloga salmantina recién llicenciada, viaxa al país centruamericanu col envís de formar mayestros. La casualidá acaba llevándola a trabayar pa la organización pro drechos humanos Madeleine Lagadec na ellaboración del Informe pa la Comisión de la Verdá pa El Salvador de les Naciones Xuníes.Testimonios autobiográficos, esperiencies humanes cola guerra y cola paz.


L'Autor:
Ruma Barbero (Xixón,1971). Llicenciáu en Bellas Artes na especialidá d’“Escultura” pola Universidá de Salamanca y miembru fundador del grupu de folk asturianu “Felpeyu”, col que continúa n’activo. Ganador nel añu 2003 del primer Premiu de Cómic de la Comarca de la Sidra, tamién ye fundador, en xunto con Xosé Antón García Sampedro, de la editorial Cactus Cómics, que publicó dalgunos de los títulos más influyentes d’esti xéneru n’Asturies. D’otra banda, tamién ye un destacáu diseñador gráficu, autor de les carátules de discos de Felpeyu, La Bandina o DRD y de carteles teatrales pa les actuaciones del grupu Nun Tris.A mediu camín ente’l cómic y el diseñu gráficu ta’l Cómic-CD de Los Ciquitrinos Faciendo l’indio (2009), del que tamién ye autor.Acullá de lo específicamente rellacionao col cómic, Ruma Barbero ye lletrista de los grupos Felpeyu, Los Ciquitrinos, Tejedor y Blima, amás de collaborador de delles publicaciones periódiques: el diariu El Comercio, el selmanariu Les Noticies o l’Anuariu de la Música Asturiana, onde llegó a publicar la primer fotonovela n’asturianu. Tamién ye miembru fundidor de de la Fundición Príncipe de Astucias.
En 2010 espubliza Manzajú, que llegó a convertise nun de los llibros n’asturiau más vendíos de los últimos años. Na rede mantién el blogue-fanzine dixital Aguantando cachones, onde nos ofrez precioses tires de cómic nes qu’aborda dellos temes d’actualidá.