martes, 18 de junio de 2013

El fracking nos ayuntamientos de Les Cuenques.



El pasáu mes d'Avientu de 2012, l'asociación La Semiente, como miembru de la Plataforma Asturiana Antifracking, presentó nos rexistros de los conceyos de les cuenques del Nalón y del Caudal una propuesta de moción encamentando a dichos conceyos a declarase conceyos llibres de fracking. Concrétamente los conceyos de Casu,  Sobrescobiu, Llaviana, Samartín del rei Aurelio, Llangréu, La Ribera, Mieres, Morcín, Riosa, Ayer y L.lena. Darréu unvióse comunicación d'esta propuesta presentada por rexistru, a los distintos grupos municipales con representatividá en ca un de los conceyos. Hasta'l momentu fueron dalgunos los grupu municipales que llevaron al plenu la Moción de conceyu Anti-Fracking con distintes resultancies.
Lo mas destacao de too ye l'aprobación de la moción en conceyos tan importantes en numberu de población como los de Llangreu, Mieres y L.lena
El primeru de los conceyos de les cuenques n'asitiase foi L.lena/Lena en febreru, qu'aprobó la moción contra'l fracking llevada a planu pol grupu municipal de Compromisu por Asturies.
En Llangreu/Langreo foi aprovada en plenu'l 26 d'abril per unanimidá. La propuesta de la Plataforma Asturiana Antifracking foi llevada a plenu pol grupu municipal d'Izquierda Xunida. En Mieres foi aprobada en plenu por unanimidá a propuesta tamién d'Izquierda Xunida el día 30 de Mayu.
Otros conceyos d'Asturies onde yá s'aprobaron mociones antifrackin anteriormente son los de Cabranes, Nava, Bimenes, Villaviciosa y Noreña.
Nestos momentos La Semiente tá unviando copies de la moción a otres asociaciones de Samartín del Rei Aurelio y de Llaviana/Laviana por que la metan nos sos respectivos conceyos y pa qu’encamienten a los grupos municipales a llevales a plenu y aprobales.
Anque percima de los conceyos tean les decisiones y competencies del gobiernu central, ye positivo el ca vez mas creciente enclín de declaración de Conceyos Llibres de Fracking en tol estáu ye una amuesa de la voluntá de los conceyos afectaos a la escontra d'una actividá que causaría non pocos perxuicios pal so medioambiente y la salú de los sos vecinos. Aparte de ser un llastre dientro d'un modelu sostenible de desenvolvimientu en munchos aspeutos. Hasta'l momentu la comunidaes autónomes d'Aragón, Cantabria y Navarra aprobaron nos sos parlamentos declarase llibres de fracking.

No hay comentarios:

Publicar un comentario