“LA SEMIENTE” DIRÁ AL PLENU DE SAMARTÍN ESIXENDO LA PRESENTACIÓN DE PRESUPUESTOS

Esti xueves 31, a les 6 de la tarde, el colectivu “La Semiente” va dir al plenu del Conceyu de Samartín del Rei Aurelio pa esixir a la Xunta de Gobiernu la presentación d'un Presupuestu Municipal pal añu 2014.

La Llei establez la obligación d'aprobar el Presupuestu Municipal el 31 d'Avientu de cada Exerciciu, de tal manera que l'unu de Xineru de cada añu debería d'entrar a valir. De nun axuntar los bastantes apoyos plenarios, esto ye, si nun resulta aprobáu, entós prorrógase'l del Exerciciu anterior. Sin embargu, a la corporación municipal de Samartín nun paez importa-y demasiáu lo que diz la llei, y asina esti conceyu lleva dellos años, funcionando (por dicir daqué) con una prórroga de los presupuestos de 2011, ensin que quienes gobiernen en Samartín nin siquiera s’hayan dignao presentar borrador de presupuestu dalgunu, no que constitúi unu de los casos más flagrantes conocíos d'ineptitú política y opacidá antidemocrática, produciendo a la vez un encorsetamientu de la xestión municipal que, de xuru, va producir ineficacia, col consiguiente dañu a los intereses de la ciudadanía.

Por tou ello, “La Semiente” ante l'acumulación d'esti retrasu escandalosu esixe la presentación inmediata del presupuestu correspondiente al exerciciu 2014.

Entendemos que nun sistema democráticu nun tien cabida esta situación, porque'l Presupuestu nun ye na más un documentu nel que quienes gobiernen detallen los ingresos que piensen llograse y los gastos a realizar y la so repartida, ye, amás, l’istrumentu de control más importante del que disponen los Grupos de la oposición y la ciudadanía nel so conxuntu pa controlar y torgar que quienes exercen el poder faigan de la so capa un sayu.

Tampoco podemos entender l'actitú de los grupos de la oposición que nun se remonten ante lo que ta pasando, nin usen les ferramientes que la llei pon al so algame pa obligar a la Xunta de Gobiernu Municipal a cumplir col so deber, y llamentamos que la ciudadanía de Samartín, y asociaciones como “La Semiente” tengan que tar de siguío protestando y denunciando la ineptitú y la desidia de tola Corporación municipal.