MOVILIZACIONES EN SOLIDARIDÁ COLES QUE LLUCHEN POR UN ALBUERTU LLIBRE, SEGURU, LLEGAL Y DE BALDRE.

MOVILIZACIONES EN SOLIDARIDÁ COLES QUE LLUCHEN POR UN ALBUERTU LLIBRE, SEGURU, LLEGAL Y DE BALDRE.

XUEVES 3 D'ABRIL. 19:30 h. PASUCAIS DENDE LA SEDE’L PSOE HASTA LA SEDE’L PP. XIXÓN. ASTURIES. Y DEMPUÉS FOLIXA-PINCHOTÉU SOLIDARIU EN SESTAFERIA, LES PERRES DIRAN PA LA CAXA DE RESISTENCIA.

LLUNES 7 ABRIL. 09:45 h. QUEDAMOS NA CASA SINDICAL DE XIXÓN PA DIR A LOS XULGAOS, ONDE VA CELLEBRASE’L XUICIU A LES IMPUTAES POR REALIZAR PINTAES REIVINDICANDO L’ALBUERTU LLIBRE, SEGURO, LLEGAL Y DE BALDRE.

TAMIÉN VAMOS SOLIDARIZANOS COL COMPAÑERU DE PARA@S Y PRECARI@S D’ASTURIES, QUE VA SER XULGÁU, A LA MESMA HORA, POR REALIZAR PINTAES A LA ESCONTRA’L PARU.

ENTAMA: ¡ASTURIES EN PIE! (Formen parte de ¡Asturies en Pie!: CSI, CGT, CNT, SUATEA, FUSOA, CENTRU SOCIAL AUTOXESTIONÁU LA SEMIENTE, PARA@S Y PRECARI@S D’ASTURIES, CENTRU SOCIAL SESTAFERIA, ASOCIACIÓN PICU RABICU).

SOFITA: PLATAFORMA FEMINISTA D’ASTURIES.

Dende ¡Asturies en Pie! queremos faer pública la nuesa solidaridá colos y coles compañeres que salen a la cai a lluchar por una sociedá más xusta y amosar la nuesa refuga a la escontra la represión que sufren les persones que nin se conformen nin se rinden.

Apocayá llegaron comunicaciones a compañeres/os pa varios xuicios el próximu llunes 7 d'abril a les 10:00 h nos Xulgaos de Xixón (al lláu de la estación de FEVE). Les paredes glayaron a la escontra’l paru, la precariedá llaboral y la emigración forzosa, les paredes glayaron a la escontra la llei del abortu, y dalgunos “bonos” ciudadanos (deben ser a los que nun-yos afeuten nin los retayos, nin los despidos, nin los desahucios, nin la precariedá, nin la falta drechos n’educación, sanidá,…y esi llargu etc que’l restu la sociedá sofrimos día ente día, porque si non nun se pescancia) decidieron llamar a la policía ya inclusu sacar semeyes.

Dempués siguieren p’allantre coles denuncies y reclamaciones la Universidá y el SESPA, dependiente de la Conseyería de sanidá. Hipocresía. El PSOE, esi mesmu que con tanta enerxía vemos despolvoriar la bandera violeta y quier testerar el refugu a la reforma de la llei del albuertu de Gallardón, o tanto crítica les reformes llaborales de Raxoy, ye’l mesmu PSOE que mos lleva a xuiciu cuando protestamos, supónse que poles mesmes razones.

Y más hipocresía. Esa xente que tanto se quexa, que tanto fala, dende’l chigre o’l sofá, de lo mal que ta’l mundu ye la mesma xente que se siente “bona” ciudadana denunciando a quien peleen pa camudar eso que dicen que ta tan mal y ye tan inxusto. Si dalguna d’esa bona xente tais lleendo esto, esperamos que se vos caíga la cara vergoña por denunciar a les persones que dan tolo que tienen pa que la vuesa vida, y la de toes y toos, seya meyor. Y sabei que si optaís pol opresor, nós siempre taremos enfrente.

L’espaciu públicu común privatizóse. Agora ye de les grandes empreses y los grandes partíos políticos que pueden financiálu a costa de nós. Los nuesos problemes, esmoliciones, opiniones y los nuesos drechos nun tienen sitiu. Nós nun tenemos valles publicitaries al nuesu serviciu, nin radios nin periódicos nin televisiones con gran financiamientu. Nós tenemos les nueses voces, les cais y les muries y nun pensamos arrenunciar a ello por más represión que nos impongan ni por más chivatos qu’atopemos nel camín.

Agora la represión llámase multa: más individual y más silenciosa pero igual de dañible ya inxusta cuando recai sobre un pueblu cada vegada más aprobetáu. Por eso tenemos de resistir. Recuperemos la cai, recuperemos les muries, recuperemos l'espaciu común, recuperemos la voz, y glayemos al alto la lleva pa francer les cadenes y la mordaza que quieren imponenos.

Quiérennos con mieu, sumises y esclaves. Nós respondemos con unidá y solidaridá:

¡Si mos toquen a una, tóquenmos a toes! ¡Énte la represión, denguna persona sola!
¡Xusticia social!.